Negreira e Auriense CA disputarán a final da cuarta edición da Supercopa Galicia, unha eliminatoria que terá un premio dobre: o título autonómico e a clasificación para a fase previa da Copa do Rei.
O Negreira volverá á final despois de superar ao Guntín nas semifinais. O equipo nicrariense deixou practicamente sentenciada a eliminatoria cun 4-0 no partido de ida no García Calvo. Na volta, o Guntín impúxose por 2-1, pero o resultado non foi suficiente para remontar a desvantaxe.
Para o Negreira, a cita ten ademais un significado especial. O club xa gañou a pasada edición da Supercopa e aquela clasificación permitiulle acceder posteriormente ao cadro da Copa do Rei. Despois de superar a previa, recibiu no García Calvo á Real Sociedad, que venceu por 0-3 e meses máis tarde acabaría proclamándose campioa da competición.
O Auriense, anteriormente Cented Academy, tivo un camiño moito máis axustado ata a final. O conxunto ourensán gañara por 1-2 ao Alertanavia en Vigo, pero os vigueses devolveron o mesmo resultado no partido de volta en Oira.
Coa eliminatoria igualada, todo se decidiu nos penaltis. O Auriense estivo máis acertado desde os once metros e conseguiu o billete para a final, na que buscará completar un dos grandes éxitos da súa recente historia.
A final disputarase tamén a dobre partido. A ida será o 23 de agosto no García Calvo de Negreira, mentres que a volta xogarase o 30 de agosto en Oira, Ourense.
O campión converterase no representante galego na fase previa da Copa do Rei, que tamén se disputará a ida e volta os días 26 de setembro e 3 de outubro.
Para o Negreira, a oportunidade de repetir unha experiencia que o pasado ano levou a un equipo de Primeira División ata o García Calvo. Para o Auriense, a posibilidade de vivila por primeira vez.
